न्यूज अभियान
हरेक खबर विशेष खबर

संयुक्त राष्ट्रसङ्घ, २८ साउन : संयुक्त राष्ट्रसङ्घका महासचिव एन्टोनियो गुटेरेसले खाडी तथा लाल सागर क्षेत्रमा जारी तनाव र द्वन्द्वको व्यापक तथा दीर्घकालीन समाधानका लागि वार्ता र कूटनीतिक संवादलाई प्राथमिकता दिन आग्रह गर्नुभएको छ । उहाँले संवादमार्फत मात्र क्षेत्रीय स्थिरता र पारस्परिक विश्वास पुनःस्थापित गर्न सकिने बताउनुभएको छ ।

महासचिव गुटेरेसले मध्यपूर्वमा विकसित पछिल्ला घटनाक्रमलाई नजिकबाट नियालिरहनुभएको उहाँका उपप्रवक्ता फरहान हकले बताउनुभयो । उहाँका अनुसार गुटेरेसको ध्यान विशेषगरी हर्मुज जलघाँटी र लाल सागर आसपासको सुरक्षा तथा समुद्री आवागमनको अवस्थातर्फ केन्द्रित रहेको छ ।

उपप्रवक्ता हकले महासचिव गुटेरेस व्यापक र दिगो समाधानका लागि वार्ता तथा संवाद नै प्रभावकारी माध्यम भएको विश्वासमा रहेको बताउनुभएको छ । उहाँका अनुसार यस्तो सहमतिले मध्यपूर्वमा स्थिरता कायम गर्न र सम्बन्धित पक्षबीच विश्वास पुनःस्थापित गर्न सहयोग पु¥याउनेछ ।

गुटेरेसले हर्मुज जलघाँटी तथा लाल सागरमा अन्तर्राष्ट्रिय समुद्री आवागमनको अधिकार र स्वतन्त्रताको संरक्षण हुनुपर्नेमा समेत जोड दिनुभएको छ । विश्व व्यापार तथा आपूर्ति व्यवस्थाका लागि महत्त्वपूर्ण यी समुद्री मार्गमा निरन्तर तनाव वा अवरोध हुँदा क्षेत्रीय द्वन्द्वको प्रभाव अझ फराकिलो बन्न सक्ने चिन्ता संयुक्त राष्ट्रसङ्घको छ ।

यसैबीच, यमनमा तनाव कम गर्ने प्रयास पनि संयुक्त राष्ट्रसङ्घले जारी राखेको छ । यमनका लागि संयुक्त राष्ट्रसङ्घका विशेष दूत हान्स ग्रुन्डबर्गले सम्बन्धित पक्षसँग संवाद तथा कूटनीतिक पहलमार्फत तनाव न्यूनीकरणका लागि काम गरिरहनुभएको हकले जानकारी दिनुभयो ।

यमनको तट आसपासको समुद्री ढुवानीमा अवरोध उत्पन्न गर्ने कुनै पनि गतिविधिले युद्धबाट प्रभावित यमनमा आवश्यक मानवीय तथा अन्य सामग्री पु¥याउने संयुक्त राष्ट्रसङ्घको प्रयासमा समेत असर पार्ने हकले बताउनुभयो ।

उहाँका अनुसार लाल सागर र बाब अल–मन्दब क्षेत्रमा समुद्री आवागमनमा हुने कुनै पनि अवरोधले यमनमा सहायता तथा आवश्यक सामग्री पु¥याउने कार्य जटिल बनाउने भएकाले त्यस्ता अवरोध रोक्नु आवश्यक छ ।

संयुक्त राष्ट्रसङ्घले मध्यपूर्वमा बढ्दो क्षेत्रीय तनावको असर समुद्री सुरक्षासँगै मानवीय सहायता, व्यापार तथा आपूर्ति प्रणालीमा समेत पर्न सक्ने भन्दै सम्बन्धित पक्षलाई संयम अपनाउन आग्रह गर्दै आएको छ ।

महासचिव गुटेरेसको पछिल्लो आह्वानले पनि सैन्य टकरावभन्दा संवाद र कूटनीतिक माध्यमबाट क्षेत्रीय तनाव समाधान गर्ने संयुक्त राष्ट्रसङ्घको प्राथमिकतालाई स्पष्ट पारेको छ ।